Feed on
Posts
comments

Vefur Höskuldar

Þetta er heimasíðan mín. Ef ég stend mig ekki nógu vel í að uppfæra hana, skaltu endilega senda mér tölvupóst og benda mér á það. Netfangið er hoski@hi.is. Þessi póstur hérna er almenn lýsing á heimasíðunni og segir líka svolítið frá sjálfum mér.

 

Ópersónulegt:

Eins og þú sérð á ferilskránni minni (sjá hnapp efst á síðunni) hef ég haft fast starf við Háskóla Íslands síðan 1980, en var þó fjögur ár (1991–1995) í launalausu leyfi úr því starfi og var þann tíma gistiprófessor við málvísindadeild Harvardháskóla. Áður hafði ég verið stundakennari við Háskóla Íslands um nokkurt skeið, þar áður kennt einn vetur við Menntaskólann við Hamrahlíð, tvo við Kielarháskóla og einn við Kennaraskóla Íslands, að mestu leyti með námi. Annars vísast í nánara yfirlit í ferilskránni. Þar er líka sagt frá helstu viðfangsefnum mínum í fræðunum. Yfirlit yfir fræðileg rit er að finna í ritaskrá og frá helstu rannsóknaverkefnum og afrakstri þeirra segir í kaflanum rannsóknaverkefni.

 

Persónulegt:

Ég hef eiginlega alltaf verið í skóla – ekki bara þann langa tíma sem ég var í formlegu námi (lauk doktorsprófi 1979) heldur er ég uppalinn í heimavistarskóla í Mývatnssveit þar sem foreldrar mínir kenndu og faðir minn var skólastjóri (ja, fyrsta eina og hálfa árið af ævi minni átti ég reyndar heima í svipuðum skóla í Mosfellssveit þar sem afi minn var skólastjóri).

En ég hef samt ekki bara áhuga á skólum og fræðum. Ég hef t.d. gaman af tónlist og hef lengi sungið í kórum, lengst í Karlakórnum Stefni. Á yngri árum, og jafnvel líka síðar, var ég í danshljómsveitum, aðallega sem söngvari. Á síðari árum hef ég líka tekið upp þráðinn í tónlistarnámi, en upphaflega lærði ég svolítið á píanó hjá móður minni. Ég hef líka áhuga á íþróttum og keppti í frjálsum íþróttum á árum áður, aðallega í hlaupum, og hef reyndar réttindi sem unglingaþjálfari og dómari í frjálsum íþróttum. Þegar ég keppti í hlaupum þótti mér best að vegalengdin væri sem styst (var t.d. liðtækur í hinni sjaldgæfu íþróttagrein 4×40 metra hlaupi innanhúss, þegar sýslumaðurinn á Blönduósi var að stíga sín fyrstu skref á hlaupabrautinni — hann fór síðar á ólympíuleika en ég ekki …) en á síðari árum hentar mér betur að skokka hægar og lengra með góðum félögum.  Þannig reyni ég að halda mér í viðunandi formi. Við hjónin höfum líka stundað gönguferðir, einkum með hinum merka gönguhópi sem kallar sig Dratthala (hópurinn drattast yfirleitt frekar seint af stað á morgnana). Svo eigum við hluta af jörð norður á Skaga (við ysta haf) og sinnum þar um æðarvarp og fleira með meðeigendum okkar þegar tími gefst til á vorin og snemmsumars. Fjöskyldan ferðast líka býsna mikið saman og hefur búið á ýmsum stöðum erlendis, m.a. tvö ár í Kiel í Þýskalandi (1970–72) og í allt hátt í 10 ár í Boston (1974–1979, 1987, 1991–1995). Konan mín, Sigríður Magnúsdóttir, er forstöðutalmeinafræðingur á Landspítalanum, börnin eru þrjú: Steinar, tónlistarupptökumaður í Los Angeles; Guðrún Þuríður, læknir; Margrét Lára, prentsmiður, ljósmyndari og háskólanemi. Barnabörnin eru tvö, Sidney Kier í Los Angeles og Sigríður Sóllilja í Mosfellsbæ.